Skábmagovat

 

Eamiálbmogiid ealligovvafestivála Skábmagovat gudnejahttá eamiálbmogiid filmmaid ja fállá máilmmiviidosaš arena ealligovaide, maid eat álo oainne stuorra mediain. Skábmagovat lágiduvvo jahkásaččat Anáris, Suoma sámeguovllu guovddážis, skábmaáiggi loahpas.

 

Skábmagovat lea okta máilmmi boarraseamos eamiálbmogiid filbmafestiválain ja dat lea dovddus sihke alla dási sisdoalus ja erenoamáš festiválabirrasis. Festiválas filmmaid beassá geahččat ee. muohtateáhteris, mii lea huksejuvvon olggos. Dakkára ii oainne máŋgga festiválas! Dieđusge maiddái siste lieggasis lea somá návddašit guhkitge filbmačájáhusain. Ealligovat čájehuvvojit duorastagas sotnabeaivái iđidis gitta eahkedii. Festiválavásáhusa dievasmahttet eahketdoalut.

 

Skábmagovaid mearkkašupmi sápmelaš ealligovaid dovddusvuođa ovdii lea stuoris. Festiválagussiid jovkui gullet jahkásaččat ealligovain beroštuvvan olbmuid lassin riikkaidgaskasaš ealligovvasuorggi doaibmit ja iešguđetlágan festiválaid ovddasteaddjit, geat leat ohcamin ođđa ja áidnalunddot filmmaid sin dárbbuide. Festivála dievasmahttá ja buktá máŋggabealátvuođa Suoma ealligovvafálaldahkii.

 

Okta festivála deháleamos ulbmiliin lea eamiálbmogiid gaskavuođaid bajásdoallan ja ovddideapmi. Skábmagovat nanne eamiálbmogiid gaskasaš ovttasbarggu, gullevašvuođa ja gulahallama. Ealligovva lea buoremus vuohki juohkit dieđu, dovdduid, máilmmigova, miellaguottuid, hástalusaid ja gova kultuvrras. Skábmagovat hálida addit saji maiddái buot uhcimus álbmogiidda. Festivála lea lunddolaš deaivvadanbáikki iešguđetlágan kultuvrraide.

 

Festivála lea oamastuvvon eamiálbmogiid ealligovaide, muhto arena lea rabas maiddái eará dáiddasurggiide. Ealligovvaprográmma dievasmahttet ee. bargobájit, ságastallandilálašvuođat ja konsearttat. Mii hálidit fállat festiválagussiide ođđa ja áidnalunddot vásihusaid.