Mánáid & Nuoraid

 

Mánáid Skábmagovat

 

Mánáid Skábmagovat-filbmafestivála dollo duorastaga 23.1.2020 diibmu 10 – 14 sámekulturguovddáš Sajosis. Mánáid Skábmagovat leat oaivvilduvvon giellabesiide, beaiveruovttuide ja skuvllaide.

 

Vuollái guđa jahkásaččaide lea sierra filbmačájáhusat parlameantasále Soljus. Mánáide čájehuvvojit sámegielat oanehisfilmmat ja mánáid tv-programmat, nugo Yle Unna Junná, SVT Sámi ja NRK tv-buvttadeamit. Unnimusaide lea fállun máiddái sámegielat duhkoraddan- ja máinnasbottut.

 

Skuvllalaččat besset geahččat oanehisfilmmaid ja davvisámegillii dubbejuvvon Jikŋon 2 Sajosa Dolla-auditorios. Dan lassin sii besset oassálastit filbma- ja mediabargobájiide. Dán háve fáddán leat animašuvnnat ja Unná Junná -bargobájiin fas jietnabarggut.

 

Mánáid Skábmagovaide galgá almmuhit ovddalgihtii maŋimustá 13.1.2020 čujuhussii tarja.porsanger@samediggi.fi dahje telefona bokte 050-5696065.

 

Nuoraid Skábmagovat

 

Nuoraid Skábmagovat-filbmafestivála dollo duorastaga 23.1.2020 diibmu 10 – 14 Siiddas. Nuoraid festivála lea oaivvilduvvon badjedási ja logahaga oahppiide.

 

Nuorat besset geahččat oanehisfilmmaid ja davvisámegillii dubbejuvvon dovddus japánalaš anime-filmma Chihiro ilmmiid gaskkas (Spirited away). Chihiro ilmmiid gaskkas guhkes animašuvdna, mii lea vuoitán Oscar-bálkkašumi jagis 2001. The New York Times kritihkkarat leat válljen dán filmma jagis 2014 oktan buot áiggiid buoremus ealligovvan máilmmis. Ja dál dat lea sámegillii!

 

Nuoraid Skábmagovaide galgá almmuhit ovddalgihtii maŋimustá 13.1.2020 čujuhussii tarja.porsanger@samediggi.fi dahje telefona bokte 050-5696065.