Dieđáhus 29.1.2020 Skábmagovat-festivála viiddis dovdduid ja dáidagiid fáláldat čohkkii Anárii váljjis olbmuid

 

Eamiálbmogiid ealligovvafestivála Skábmagovat lágiduvvui Anáris 23.-26.1.2020. Dánge jagi festiválagussiid mearri dagai lágideaddjiid duđavažžan – festiválas fitne sullii 4000 olbmo, mii lea sullii 300 olbmo eanet go diibmá, iige báze guhkás jagi 2012 geahččiolahusas.

 

Filbmačájáhusat ledje oktiibuot 30, main bivnnumusat ledje Sámi allaskuvlla ja Sámi oahpahusguovddáža studeanttaid filmmaid sisttisdoallan “Sápmi: Čuovga ja seavdnjadas”, sápmelaš ealligovain čohkkejuvvon lávvardateahkeda čájáhus Guovssahasteáhteris sihke Elle-Máijá Tailfeathersa ja Kathleen Hepburna bagadallan Rumaš muitá go máilbmi rahtasii-filmma čájáhus, mas báikki alde lei Tailfeathers ieš. Tailfeathers maid bálkkašuvvui festiválas Skábmagovat-bálkkašumiin – luhkain, man lei duddjon nuortalaš dáiddár ja duojár Heidi Gauriloff.

 

“Geahččilogut čujuhit, ahte eamiálbmogiid filmmat beroštahttet geahččiid ja dákkár sisdollui lea diŋgojupmi dál ja boahttevuođas maid. Midjiide lea illu beassat doaibmat arenan dakkár govaide ja sániide, mat váldokultuvrras báhcet álkket fuopmášumi haga. Mii leat giitevaččat nu gussiide go filbmadahkkiide das, ahte dát lea vejolaš”, illuda festivála dáiddalaš jođiheaddji Jorma Lehtola.

 

Skábmagovat fállá juohke jagi vásáhusaid maid filbmačájáhusaid olggobealde – nu maiddái dán dálvvi. Festiválagussiin lei vejolašvuohtá oahpásmuvvat vr-ealligovaide ja sapmifilm.com-bálvalussii, čuovvut ságastallamiid filmmaid ruhtadeamis, sohkabeallerollain ja eamiálbmogiid áitagiin, oassálastit girjji almmuhandilálašvuhtii, gullat ealli musihka sihke oaidnit Elisabeth Heilmann Blinda dánsumin fiinna ruonáeatnanlaš máskadánssa, mii gesii Sajosa auditoria áibbas dievva. Maiddái bearjadaga ja lávvardaga ordnejuvvon Skábmaklubba-eahketdoalut čohkkejedje báikki ala guktuid eahkediid guossiolahusa.

 

“Midjiide lea dehálaš bastit sihke filbmaválljejumiin ja oalgedáhpáhusain bálvalit ja hohkahit báikki ala máŋggabealát olmmošjoavkku. Skábmagovat lea filbmafestivála lassin maid kultuvrraid ja olbmuid deaivvadanbáiki, gos sáhttá lonohallat jurdagiid ja vásihusaid. Beroštupmi oalgedáhpáhusaide muitala midjiide, ahte guossit gáibidit ollislaš festiválavásáhusaid”, kommentere festivála buvttadeaddji Taru Arrela.

 

Festivála ovttasbarggus Sámemusea Siiddain, Sámekulturguovddáš Sajosiin, Sámi oahpahusguovddáš – SOGSAKKiin ja Eamiálbmogiid filbmaguovddáš – Skábmain lágidan Sámidáidaga doarjjasearvi hálida giitit buot filbmadahkkiid, festivála gehččiid ja gussiid, ruhtadeaddjjiid, ovttasbargoguimmiid, doarjaleaddjiid, ságastalliid, loaiddasteaddjiid, prográmmaláidesteaddjiid, eaktodáhtolaš bargiid, muohtahuksejeddjiid, SOGSAKK studeanttaid ja Sámi dáidaga doarjjasearvvi lahtuid.

 

Lassidieđut:

Dáiddalaš jođiheaddji Jorma Lehtola
050 414 4349 / ​jorma.lehtola@skabmagovat.fi

Festivála buvttadeaddji Taru Arrela
040 1911621 / ​taru.arrela@skabmagovat.fi