NUGO SKÁBMAGE OLLE DAVÁS JUOHKE JAGI, DE MÁIDDÁI SKÁBMAGOVAT ÁLGOÁLBMOGIID FILBMAFESTIVÁLA ORDNEJUVVO OĐĐAJAGEMÁNUS 2021.

 

Koronavirusa dagahan spiehkastatáigi ja -dilli váikkuhit maiddái Skábmagovat filbmafestivála ordnemii. Mii hálidit goitotge máilmmi dilis fuolatkeahttá fállat olbmuide viiddis filbmalávddi ja eará dáidda- ja kulturfáláldagaid nugo leamaš vierrun. Festivála teman jagis 2021 lea searvvušlašvuohta ja sámefilmmat – vajálkeahttá eará álgoálbmogiid filmmaid. Festivála álgá guovtte diimmu guhkosaš rahpansáddagiin, mii sáddejuvvo neahta bokte 29.1.2021 dainna lágiin, ahte buohkat sáhttet geahččat dan. Rahpandoalluin fállat máŋggabealat dáiddafálaldaga, mii sisttisdoallá earet eará oanehis filmmaid, jearahallamiid, musihkka ja performansadáidaga.

 

Buot jagi 2021 festivála dáhpáhusaid plánemis váldit vuhtii pandemiadili ja dorvvolašvuođa. Mii čuovvut dárket virgeoapmahaččaid rávvagiid ja ráhkkanit koronadili vearráneapmai nu ahte plánet festivála ordnema maiddá ollásit digitála hámis. Goitotge juos pandemiadilli ráffu ja dahká midjiide vejolaččan; de dalle čájehit muhtin filbmačájáhusaid Anáris guovllu olbmuide ja váldit dieđusge vuhtii dorvvolašvuođa. Leš dal festiválabuvttadeapmi ollásit neahtas dahje hybridahámis de sávvat ahte juksat unnimusat fásta gussiid ja dán earenoamaš vejolašvuođa bokte maiddái ođđa geahččiid digitála festivála bokte.

 

Vaiko eat vealttakeahttá sáhtege dán dilis ovttas čoahkkanit návddašit filmmain davás; mii goitotge geahččalit buoremus lági mielde bargat nu, ahte buohkat besset vásihit eakti Skábmagovat filbmafestivála atmosfeara – vaikovel gártatge dahkat sierranas ordnemiid.

 

Skábmagovat ordnejuvvo 29.-31.1.2021. Mii beaivádit festivála dieđuid ja ođđasiid neahttasiidduid, sosiála mediaid ja dieđáhusaid bokte.

 

 Skábmagovat – álgoálbmogiid filbmafestivála leat ordnemin Sámi dáidaga doarjjasearvi ovttasbarggus Sámedikki álgoálbmot filbmaguovddáš Skábmain, Sámeguovllu oahpahusguovddáziin, Yle Sámiin, Sajosiin ja Siiddain.