Dieđáhus 25.1.2020 Skábmagovat-bálkkašupmi Elle-Máijá Tailfeathersii

 

Filbmabagadalli Elle-Máijá Tailfeathers lea ožžon jagi 2020 Skábmagovat-bálkkašumi barggustis eamiálbmogiid ealligova ovdii. Bálkkašupmi geigejuvvui Tailfeathersii dál 22. háve lágiduvvon Skábmagovat -eamiálbmogiid ealligovvafestiválas lávvardateahkedis 25.1.2020, muohttagis huksejuvvon Guovssahasteáhteris Anára gilis.

 

Tailfeathers lea čáhppesjuolgi-sápmelaš filbmadahkki, buvttadeaddji, neavttár ja aktivista. Kanádas bajásšaddan Tailfeathersis lea nana čanastat áhčis ruoktoguovlluide dážabeal Sápmái, gos son lea doaibman ee. neavttárin Beaivváš Sámi Našunálateáhteris.

 

Vancouvera ealligovvaskuvllas jagis 2006 válmmaštuvvan Tailfeathers lea dahkan máŋggaid oanehisfilmmaid, maid vuolggasadjin leamašan aktivisma, sosiálalaš vuoiggalašvuohta ja eamiálbmogiid čuolmmat. Su árat buvttadussii gullet ee. Bloodland (2011), A Red Girl’s Reasoning (2012), mii kommentere eamiálbmotnissoniid goddimiid ja láhppomiid sihke Bihttoš – Rebel (2014), man fáddán lea Tailfeathersa sápmelaš duogáš. 

 

Elle-Máijá Tailfeathersa vuosttas guhkes ealligovva, ovttas Kathleen Hepburniin bagadallon The Body Remembers When The World Broke Open lea jo geargan vuoitit máŋggaid bálkkašumiid ja leamašan kritihkariid válljejupmi diibmá buoremus kanádalaš ealligovvan. Ealligovva, man vuosttaseahket lei Berlinales jagis 2019, govvida guovtte nissona deaivvadeami soaittáhagas, go nubbi lea báhtareamin bearašveahkaválddi. Ealligovva čájehuvvui filbmafestivála Skábmagovain lávvardaga 25.1. čájáhusas mii lei bahkkadievva. 

 

“Mii hálidit dáinna bálkkašumiin čujuhut, mo mii atnit árvvus su barggu erenoamážit sápmelaš ealligovvaservošii. Tailfeathersa karriera čalmmustahtta, mo bargu eamiálbmogiid filmmaid ovdii lea máilmmiviidosaš iige čatnon dušše ovtta báikái. Son movttiidahttá máŋggaid earáid ja ovdamearkkainis čujuhusa, mo fiidnát ealligovain sáhttá gullot maid sosiálalaš oamedovddu jietna”, vuđoštallá festivála dáiddalaš jođiheaddji Jorma Lehtola. 

 

Lassidieđut:

Festivála dáiddalaš jođiheaddji Jorma Lehtola

050 414 4349 / jorma.lehtola@skabmagovat.fi
Festivála buvttadeaddji Taru Arrela
040 1911621 / ​taru.arrela@skabmagovat.fi