Nissonenergiija ja gielaid ávvuriemut filbmafestivála Skábmagovain Anáris

MEDIADIEĐÁHUS 1.2.2020


Nissoniid ja Mátta-Amerihká eamiálbmogiid filmmat lea guovddážis go eamiálbmogiid filbmafestivála Skábmagovat álgá 22. háve Anáris 23.1.2020.

 

Badjel guokte goalmmátoasi dán dálvvi Skábmagovaid prográmma sisdoaluin lea nissoniid buvttadus, Jaskes ábi sulluin Ruošša siseatnamiidda ja Sámi duoddariidda. Filmmat gieđahallet ovdamearkka dihte bearašveahkaválddi veahkeheami geahččanguovllus, Meksiko nuoraid fárrema gávpogiidda ja nissonvuođa gážaldagaid Jaskes ábi sulluin.

 

Dán dálvvi temáguovllu, latinalaš Amerihká, dovdamušat filbmegággásii bohtet sihke nu Perus, Kolumbias, Meksikos ja Brasiliasge. Filmmaid bokte beassá čuovvut ee. dálkkádatrievdama váikkuhusaid nissoniid eallimii Andiin ja árbevieruid sirdima hástalusaid modearna máilmmis.

 

Sápmelaš ealligovaid spektra ollá álo Sámi allaskuvlla filbmasuorggi studeanttaid dujiin Elle-Máijá Tailfeathers’a (blackfoot-sápmelaš) bálkkašuvvon debyhttafilbmii The Body Remembers When the World Broke Open.

 

Ollislaččat Skábmagovaid prográmmas oidno badjel 30 álbmoga váikkuhus ja váldogielaid lassin čájáhusbáikkiin čudjet 24 eamiálbmotgiela. Festiválas čájehuvvojit maiddái vuosttas filmmat aimara- ja haidagielain: Óscar Catacora fikšuvdna Wiñaypacha lei Peru Oscar-evttohas jagis 2019, go fas Gwaai Edenshaw’a ja Helen Haig-Brown’a myhtalaš Sgaawaay K’uuna doaimmai hui áitatvuloš haidagiela ealáskahttima dehálaš bárgobádjin Kanadas.

 

Festivála oalgedáhpáhusat sisttisdollet ee. rumbudánssa Ruonáeatnamis, musihka klubbaeahkediin, sirdašuvvama čuovvovaš logijahkái Virtual Reality bokte sihke lávvardateahkeda erenoamáščájáhusa, mii sisttisdoallá ságastallama áitagiin, mat uhkiidit eamiálbmogiid.

 

Eamiálbmogiid ealligovvafestivála Skábmagovat ordnejuvvo Anáris 23.-26.1.2010. Skábmagovat lea okta boarraseamos eamiálbmogiid ealligovafestiválain ja dat ordnejuvvo dál 22. háve. Ealligovvačájáhusat ordnejuvvojit sámemusea ja luondduguovddáš Siiddas, kulturguovddáš Sajosis ja earenoamášvuohtan muohttagis ráhkaduvvon guovssahasteahteris, mas filmmaid beassá geahččat olgun. Jagi 2020 festivála fáddán lea oktavuohta eatnamii ja prográmmas leat sápmelaš ealligovaid lassin erenoamážit Mátta-Amerihká eamiálbmogiid filmmat. Ođđa logijagi gudnin ealligova báldii buktojuvvo maiddái dánsa.

 

Skábmagovaid ordne Sámidáidaga doarjjasearvi ovttasbarggus sámekulturguovddáš Sajosiin, sámemusea ja luondduguovddáš Siiddain, Sámi oahpahusguovddážiin, Yle Sámiin sihke Anára gielddain.

 

https://www.skabmagovat.fi/programma-2020/

 


Lassidieđut:

 

Dáiddálaš jođiheaddji Jorma Lehtola (festiválaprográmma)
050 414 4349 / jorma.lehtola@skabmagovat.fi

 

Buvttadeaddji Taru Arrela (festivála ordnen, oalgedáhpáhusat)
040 1911621 / taru.arrela@skabmagovat.fi

 

Govva: Sgaawaay K’uuna / Edge of the Knife | Kanada, 2018